ساعات بفكر

  ساعات أجلس و أفكر … لا أدرى فيم ؟! لكنى أفكر … ساعات أرغب فقط فى التحديق فى تلك النقاط البيضاء فى طلاء الحائط الأبيض … لا أدرى لم ! ؟

فى بعض الأحيان يكون التفكير متعة فى حد ذاتها .. حين تفكر لمجرد التفكير .. أعرف أن ذلك قد يظهر للبعض ترفا  أو شيئا مبالغا فيه .. خاصة هنا فى بلدنا ( الغلبانة) لكن ليه لأ ؟! ربما شوية التفكير دوول همه اللى هيجيبوا فى الزمن ده … ربما لو فكرت و انت قاعد مع نفسك فى لحظة صفا زى ما بيقولوا ، هتلاقى اجابات لحاجات كتيرة كنت بتشوفها مبهمة و ملهاش سبب ..

ساعات بلاقى نفسى بفكر .. ليه مثلا زميلتى اياها بتحط كيلو بودرة فى وشها ؟! رغم انه ده مش مخليها أحلى بل بالعكس أوحش … مش يمكن لو فكرت شوية أعذرها ؟ مش يمكن هى حسه انها أقل من زمايلها فى الجمال و يا عينى نفسها تبقى حلوة و لو حتى بانها توهم نفسها ..

طب ليه و انت سايق فى الشارع و كله تمام ، فجأة تلاقى واحد أهبل ماشى عكس الاتجاه !!  عمرك فكرت ليه ؟ مش يمكن معقد نفسيا و باباه و مامته و هو صغير كانوا خانقينه و ممشيينه على عجين !! فحب لما يكبر يعمل  اللى معملوش و هو صغير و يمشى عكس الناس ما بتعمل !!

ساعات بحس انه أقوى و أصعب المشاكل سببها كان أتفه من اننا نفكر فيه أو ننتبه له .. و ان أغلظ القلوب كان من الممكن استمالتها بكلة طيبة لكن للأسف فات أوانها ..

ياريت كلنا نفكر فى تصرفاتنا مع بعضنا لأن أصغر تصرف خطأ ممكن يغير مصير شعب بحاله .. و لأنه دايما ممكن نصلح أخطاْنا بس لو اكتشفناها و كان عندنا الشجاعة اننا نواجه نفسنا بيها .. و نقول ببساطة اننا غلطنا ..

مشكلتنا اننا مستكبرين نقول اننا بنغلط .. حتى لو ده هيتسبب فى استكمال الخطأ و الاستمرار فى ارتكاب الحماقات ..

بقلم :  مونى توتة