مقهى الستات

مظاهرات الشموع السوداء و ليبرالية الدموع الحمراء

واحدة ترتدى البدلة الرياضية و الكوتش السينييه و معلمة من زباين المعملة سماسم تمسك الشيشة بيد و الآيس كريم باليد الأخرى ، اترصصت هذه المجموعة المتناقضة على مائدة واحدة و ربنا ما يورى لا عدو و لا حبيب الكل بيتكلم فى السياسة بشكل عبث تلقائى عشوائى لا تقوللى ليبرالية و لا ديمقراطية و لا مهلبية …

دخلت بكيزة هانم بالصوندال الشفتشى أبو كعب ماسى و جلست واضعة رجل على رجل و الدموع فى عينيها و قالت : "ايه ده مش ممكن الفيولونصviolance ( العنف بالفرنسية) دمروا كل الأماكن اللى كنت ناوية أقضى فيها الفاكونصvaconce بتاعة الصيف…"

بقرف شديد نظرت لها الأستاذة فكرية الذكية صاحبة أكبر نظارة قعر كوباية و أطلقت فى وجهها البكيزى صاحب المقام العالى صواريخ ال آر بى جى و لا صواريخ حزب الله بسؤال عن تلك التفاهات التى تقولها عن حسرتها على ضياع مخططات أجازتها أمام ضياع البنية التحتية اللبنانية …

و ظلت فكرية الذكية تسوى جنبات بكيزة على جمرات النارعلى تفاهاتها و لم تتركها إلا و هى تبكى و ساحت الماسكرا على وجنتيها المنفوختين بفعل عمليات التجميل و لم ينقذ الموقف إلا تدخل بنت البلد المعلمة سماسم فاردة ملاءتها على المائدة و قد أطاحت بهذه الحركة بالباروكات و القبعات و كابات الرياضة و بعلو صوتها و بالحنجور المتربى فى الحارة صرخت فى وجه فكرية الذكية : " جرى ايه يا ست الأستاذة هوه عشان ربنا كرمك بشوية أستذة هتتأستذى بيهم علينا ؟ و الله ما جابنا ورا غير الكلام اللى احنا مش فاهمينه ده !! ماحنا لو نفهم اللى بتقولوه ما كانش الحال بقه هو ده الحال و لا فضلتوش كده بتأذنوا فى مالطة ، كل واحدة شايلة لسانها و عليه كلام مكعبر .. بقالنا من ساعة ماتولدنا بنسمع فى كلام مش فاهمينه … على الطلاق

بالتلاتة اللى هتقلد فيكو الرجاله اياهم بتوع النضال فى القهاوى و تتكلم و بس، لأكون مدغدغه راسها …"

وقفت فكرية الذكية و هى تثبت نظارتها المقعرة و قالت : " أنا اتهزأت … سوف أضطر للإنسحاب "…

و هنا وقفت الدكتورة مونيكا الليبرالية الصنع الحقوقية الانسان المفلسفة من منطلق الرفق بالحيوان قبل الانسان وقالت : " شات آب shut up انتو اييييييييه !!! رغايين كده لييييييه .. البوبى بتاعى مبيحبش الدوشة .. أنا شايفة انه كل واحد يعبر عن رأيه فى مظاهرة سلمية بالشموع … طبعا الشموع شكلها أحلى بكتير من الافتات و الكلام الفاضى ده .. يلا باى "

و مشيت مونيكا ساحبة وراها الكلب بتاعها ، و راحت بكيزة هانم النادى عشان عندها جلسة ماساج ، أما الأستاذة فكرية الذكية فذهبت للجمعية اياها دى … و بقيت المعلمة وحدها فى ( قهوة السوياسة ) و قالت لنفسها " و الله اما عجايب … اللى يعيش ياما يشوف … مالها الستات و مال السوياسة !! "

نقلا عن صفحة أنا و هى (أخبار اليوم)